Si çdo të shtunë, “Big Brother” ka përgatitur një surprizë të këndshme për banorët. Kopshti i shtëpisë është kthyer në një sallon të vërtetë bukurie. Vajzat janë grimuar dhe u është bërë stilim i flokëve nga specialistë të vërtetë, ndërsa meshkujve, përveç modelimit të flokëve, edhe masazh fytyre. Banorët kanë mbetur të mrekulluar nga kjo surprizë e veçantë, sidomos pas dhuratave që kanë marrë. Banorët bisedojnë mbi kandidimet. Ndërsa Olsi e ndien më shumë largimin e qenushit Big. Katër të kandiduarit që rrezikojnë të largohen të shtunën e ardhshme janë Najada, Poli, Jonida dhe Dorina. Olsi e pyet Najadën nëse është mërzitur nga kandidimi, por ajo i përgjigjet se nuk është mërzitur aspak.

Arbri me Olsin kanë dalë në kopsht dhe bisedojnë mbi emocionet e spektaklit dhe kandidimet e papritura. Arbri kujton ditëlindjen që festoi brenda shtëpisë më të famshme në Shqipëri. Të dy me Olsin mendojnë se është me të vërtetë një privilegj ta festosh ditëlindjen në këtë mënyrë. Ata flasin për natën finale të “Big Brother” dhe eliminimet e fundit. Banorët janë përshtatur më së miri brenda shtëpisë. Arbri thotë se dy vajzat e reja dolën të forta dhe se nuk e prisnin të largoheshin Romina me Besartën. Edhe Olsi nuk mendonte se do të largoheshin ato të dyja. Të dy bisedojnë se si mund të organizohen eliminimet të shtunën e ardhshme dhe se do t‘i marrë shumë malli për qenushin Big. Në bisedë bashkohet edhe Poli, i cili i tregon për surprizën që i kishte organizuar atij Vëllai i Madh, duke e ftuar në intervistë për të dhënë një mendim mbi Inën dhe atë vetë e dy mamatë e tyre.

Dorina me Jonidën ndodhen në kuzhinë dhe flasin për emocionet e eliminimeve. Dorina thotë se emocionet ishin shumë të forta, ajo shpreh keqardhjen e saj mbi largimin e Rominës.

Pjesa tjetër e banorëve kanë dalë në kopsht. Olsi, Arbri, Astriti dhe Dorina flasin për buxhetin dhe menaxhimin e tij, i cili tashmë i është reduktuar, pas humbjes së provës së javës. Si për të ndryshuar temë bisede, Najada u kujton banorëve ditëlindjen e Olsit dhe shpreh dëshirën e saj për t‘i bërë një dhuratë. Edhe Arbri e mbështet plotësisht dëshirën e Najadës dhe shton se duhet t‘i organizojnë një surprizë të bukur Olsit, por Najada i kujton vështirësinë e përgjysmimit të buxhetit.

Biseda e banorëve vazhdon me opinionet e tyre rreth eliminimeve nga shtëpia e “Big Brother”. Banorët kanë arritur në përfundimin se loja është shumë e paparashikueshme.