Flet Romina, një ndër personazhet më të lakuara të “Big Brother”-it

Romina tashmë është e lirë. Prej tri ditësh jeta e saj nuk shoqërohet nga lëvizjet e kamerave të Vëllait të Madh. Thotë se ndihet mirë dhe se këto ditë përveç takimeve të pafundme me miqtë dhe të afërmit, është duke u ambientuar me oraret. Vajza 20-vjeçare që arriti të bëhej një nga personazhet më të përfolura brenda shtëpisë së “Big Brother” duket e njëjta dhe jashtë. Thotë se muajt brenda në shtëpi do të mbeten një eksperiencë e bukur që do t‘i vlejë në jetë. Për sa u përket grindjeve brenda shtëpisë, sidomos Çimit, për të ato i përkasin lojës. Për të gjithë ata që janë kuriozë të dinë se si do të jetë qëndrimi i saj ndaj Çimit (duke pasur parasysh marrëdhënien e tyre brenda) Romina thotë se sapo është ndarë nga Çimi dhe e shoqja, Rudina, me të cilët kishte pirë një kafe.

Romina është aktualisht studente e vitit të tretë në Fakultetin e Shkencave Sociale. Njëkohësisht ajo punon part-time në një institut italian në Shqipëri që merret me kërkime dhe sondazhe. Ajo ka qenë dikur aktiviste e lëvizjes “Mjaft” dhe i pëlqen që në të ardhmen të merret me politikë. Ka një pasion të madh për filmat horror. Pas aventurës së saj në shtëpinë e “Big Brother” ajo do ta shikonte veten e saj më shumë në politikë sesa në botën e spektaklit. Por për të parën ka kohë. Le të flasim për të dytën…

Romina, si kanë qenë tri ditët e para jashtë shtëpisë së “Big Brother”?
Fillimisht jam çmallur me familjen. Jam takuar me miqtë, të afërmit. Ditën e daljes nga shtëpia e “Big Brother” vëllai dhe shokët më kishin rezervuar një surprizë, duke bërë një party për mua. Ishte një mbrëmje e bukur e cila zgjati deri në mëngjes, ku përveç shoqërisë sime ishin prezentë edhe ish-banorët e “Big Brother”. Ajo çfarë po mundohem tjetër të bëj këto ditë është të ambientohem me orarin.

E prisje që do të ishe ti banorja që do linte shtëpinë?
 Duke kaluar 7 kandidime kisha filluar të ndieja një farë sigurie. Por normalisht loja është lojë dhe ka të papriturat e veta. Dhe të papriturat janë të bukura.

Si e kishe imagjinuar jetën brenda “Big Brother” para se të bëheshe pjesë e kësaj loje dhe tani që e jetove këtë eksperiencë mund të na tregosh diferencën mes ëndrrës dhe realitetit?
Unë gjithnjë kisha dashur të isha pjesë e një reality-show të tillë. Pavarësisht asaj çfarë unë imagjinoja, e dija që nuk do të ishte një sfidë e lehtë. Por unë hyra brenda shtëpisë me idenë që të krijoja marrëdhënie normale me pjesën më të madhe të banorëve duke njohur veten. Të gjeja ndoshta një nivel më të lartë në debat dhe në diskutime. Mund të them se ky nivel ka qenë prezent, por jo gjithmonë. P.sh., javët e para brenda shtëpisë ishin të mbushura me debate për gjëra të ndryshme. Por më pas ndoshta filluam të njiheshim më shumë, duke shfaqur secili pjesë të ndryshme të karakterit të vetë, gjë që i dha një kah tjetër lojës.

Ti ke qenë një ndër banorët që është kandiduar më shumë. Çfarë mendon që banorët e tjerë të shtëpisë nuk kanë pëlqyer te ty?
Ndoshta nuk kanë pëlqyer faktin se unë debatoja me pjesën më të madhe të tyre. Nuk kanë pëlqyer faktin se unë i kthehesha gjithnjë Shkëlqimit. Ndoshta fillova të nxirrja në pah dalëngadalë dhe huqet e mia. Hiq arsyet banale të kandidimeve që unë kam pasur, mendoj se ato janë bërë dhe për rivalitet. P.sh brenda shtëpisë ka pasur tipa që në fillim më kanë quajtur arrogante dhe vetëm disa javë më vonë kanë kuptuar se unë nuk isha e tillë, duke pranuar se konstatimi i tyre nuk ishte i drejtë.

Ndoshta ishte mënyra sesi unë reagoja që i bënte banorët ta mendonin këtë gjë dhe më vonë kur më njihnin më mirë ndryshonin mendim. Një ndër ta që ka ndryshuar mendim për mua ka qenë Arbri.

Më kanë quajtur dhe aktore të mrekullueshme. Më jepni një “Oskar”.

Le të ndalemi pak te marrëdhënia jote me Shkëlqimin, e cila kulmoi një javë para se ai të dilte nga shtëpia. Çfarë ndodhi mes jush?
Në fillim mendoja se Çimi bënte lojë të bukur dhe normalisht e shihja si rival, duke mos harruar që gjithë banorët kanë luajtur në bazë të karakterit të tyre.

Nuk kam qenë unë ajo që sulmova Çimin. Gjeta sulm nga ai, dhe në momentin kur Shkëlqimi doli në nominim, ishte koha e duhur dhe vendi i duhur që unë t‘u përgjigjesha sulmeve të njëpasnjëshme të tij, gjatë dhjetë javëve rresht. Shumë veta më kanë pyetur pse pikërisht në atë moment unë bëra një veprim të tillë dhe pse nuk e kisha nominuar më parë. Përgjigjja ime ishte se ishte koha dhe vendi i duhur.

Çfarë kisha për të sqaruar me të në lojë i sqarova.

Cilat kanë qenë për Rominën ditët më të mira brenda shtëpisë së BB?
Përgjithësisht kam kaluar momente shumë të bukura, përfshi këtu edhe prerjen e flokëve. Kam bërë shumë gallata. Si prova me demin, prova me karaoke, e videoklipit. Momente të bukura kanë qenë dhe futja e dy aktorëve të “Portokallisë” dhe ardhja e Big Mamës dhe Vesa Lumës.

Po ditët e vështira?
Kanë qenë dy momentet kur kam pasur nevojë për një kontroll mjekësor. Zënka e parë me Junën dhe me Gitin. Kanë qenë dhe momentet kur acarohesha me të vërtetë me Olsin. Dhe sidomos debatet pa produktivitet me Çimin.

Sa e vërtetë ishte Romina gjatë dy muajve në shtëpi, në ato çfarë thoshte?
 Duke hequr pjesëve të cilat unë i kam quajtur “shaka” ose “lojë”, Romina ka qenë pothuajse tërësisht e vërtetë.

Gjërat që kam thënë dhe që kam bërë brenda shtëpisë nuk jam penduar dhe vazhdoj t‘u qëndroj fuqishëm.

Për shakanë tënde me Olsin “kur i the që doje”?
Unë e kisha bërë me fjalë me Noçen dhe me Çimin që ta ngacmonim pak Olsin, meqë ai ishte në nominim atë javë. U thashë atyre që do t‘i thosha Olsit se e dashuroja. Desha të kompletoja tablonë e profilit që unë kisha formuar aty, por ishte dhe një matje pulsi se si do të reagonte Olsi në një situatë të tillë aq të papritur.

Olsi del nga dushi, unë isha në krevatin tim dhe i them se doja t‘i thosha diçka. Ai vjen dhe unë i them se e doja se kisha biseduar dhe me Noçen për këtë gjë, dhe doja që ai ta merrte vesh këtë gjë. I thashë se po i them se e dua se nuk doja që ai të ndryshonte tashmë sjellje me mua, por thjesht për t‘u çliruar vetë. Loja ime vazhdoi edhe pas kësaj bisede. Patëm një bisedë tjetër. Olsi dyshonte se ishte lojë, megjithatë nuk e di si është konceptuar kjo shaka e imja nga shikuesit jashtë. Pashë që deri diku ngeli i habitur, pasi nuk e priste, por ishte thjesht një lojë. Nuk e bëra as për t‘u dukur interesante, thjesht duheshin dhe këto lloj gjërash se vetë ambienti dhe koha e gjatë brenda të bën të bësh këto gjëra të dalësh nga monotonia që na kishte mbytur…

Na trego pak për shakanë e 1 prillit?
Unë e kam thënë ishte një lloj testimi për të nxjerrë në pah fytyrat e vërteta të disa banorëve dhe deri në një farë pike doja të thosha se “ju vërtet po më ndaloni për të dalë, por unë dua të di psenë në momentin kur unë isha një ndër banoret më e padëshiruara në shtëpi dhe kur fare mirë mund të mos ishin treguar hipokritë dhe të më përcillnin te dera.

Tre persona që e morën seriozisht daljen time ishin Olsi, Shkëlqimi dhe Ilda, duke thënë se kjo nuk është e drejtë. “Ti dukesh shumë e fortë dhe s‘duhet të ikësh në këtë mënyrë”, thoshin ata.

Të tjerët siç duket e kishin kapur që ishte lojë. Megjithatë, mua më pëlqeu vetëm reagimi i Olsit, Çimit e Ildës. Për mua ky ishte një test pavarësisht se u akuzova se u talla me ndjenjat e banorëve.

Me cilët nga banorët u lidhe më shumë?
Banorët që unë nuk kam dashur të dilnin ishin Olsi, Noçja. Më pas Ola, e cila për mua bëri gabim që u soll ashtu, Titi edhe Arbri dhe Ilda. Me këta banorë jam ndjerë më mirë.

Tani që e sheh BB si të duken nga jashtë?Shumë pak e kam ndjekur, pasi këtë kohë e kam shfrytëzuar për të takuar njerëzit që më munguan, por e ndiej se kanë rënë pak në monotoni. E kam thënë edhe kur kam qenë brenda duhet të kishte pak më shumë kreavitet, do preferoja t‘i shihja më aktivë, pasi dhe pak ditë na ndajnë nga finalja.

Duke qenë se dhe pak ditë na ndajnë nga finalja. Si e parashikoni?
 Besoj se do të ketë “luftë të ftohtë” midis banorëve. Mendoj se do të ketë debate shumë ndoshta dhe të ashpra. Por për të parashikuar nuk mund të them. Përveç dy të rejave për mua të gjithë të tjerët në një farë mënyre janë fitues.

Për çfarë mendon se do shërbejë eksperienca në BB, në jetën tënde?
Në një farë mënyre ka shërbyer t‘i njoh njerëzit akoma dhe më mirë dhe në një farë mënyre të mos paragjykoj, pasi gjithsecili nga ne paragjykon qoftë më pak qoftë më pak apo shumë. Unë këtë vit diplomohem. Shpresoj të gjej një punë stabël. Të tjerat ia lë kohës.

Jeni shprehur brenda shtëpisë që e shihni veten në të ardhmen në politikë?
Kjo është një dëshirë e imja. Unë do mundohem ta realizoj, por për momentin është thjesht një dëshirë.

Burimi: Gazeta Shqip

Be Sociable, Share!