Asgjë nuk është si më parë për Olta Shetën: do të ndalojë për të përshëndetur njerëz që nuk i ka njohur deri dje, të japë autografe, madje edhe të pranojë të pozojë me fansat duke bërë fotografi. E pranon se nuk ka bërë asnjë mëkat teksa ka tentuar të tregojë të vërtetën e historisë së dashurisë mes Erionit dhe Bertinës, nuk ka asnjë peng për lojën, por nuk ka se si ta mohojë se tre miqtë që ka lënë brenda në shtëpinë e Big Brother do ti mungojnë edhe për pak. Për herë të parë, Olta rrëfen marrëdhënien me Erionin dhe atë që ajo e quan xhelozi e sëmurë e Bertinës, që mendonte se ka pasur qëllime intime ndaj tij. Në këtë pikë, vajza karizmatike e Big Brother, pranon të rrëfejë se përse Bertina realisht nuk afrohej në shijet e femrave që pëlqen Erioni. Sekreti dhe etaloni i bukurisë është një mikeshë e Oltës, ish-e dashura e Erionit, i cili duket se nuk e ka harruar vajzën që ka zëvendësuar Bertina…!

Ke dy javë që ke dalë nga shtëpia, çfarë të mungon më shumë?

Tre personat që më mungojnë më shumë që kur kam dalë janë Klodi, Seldi dhe Domi, me ata bëja më shumë gallatë dhe bisedoja, ndërsa për të tjerët jo.

Ka ndryshuar ndonjë gjë në ritmin e ditës tënde?

Jo, nuk ka ndryshuar asnjë. Kam vijuar jetën normalisht, ashtu si e kisha lënë para se të hyja në shtëpi, me përjashtim të faktit që tani njerëzit më njohin më shumë në rrugë, më ndalojnë dhe më komplimentojnë për lojën time, madje disa prej tyre habiten, që jam shumë ndryshe nga sa mund të më kenë njohur përmes ekranit në Big Brother.

Ashtu si edhe ju, shumë njerëz u habitën nga eleminimi, pse mendon se të votuan?

Edhe vetë atë natë nuk e prisja eleminimin. Isha nominuar disa herë, por atë natë që dola nuk e prisja. Nuk e di se cila ka qenë arsyeja e vërtetë që publiku më ka votuar të dalë jashtë shtëpisë. Ndoshta shoqërinë time me Erionin e ka marrë në anën e kundërt që ajo ishte realisht, por dua të theksoj se mes nesh ka pasur vetëm shoqëri të pastër.

A je e bindur se nuk ke bërë asnjë mëkat, që të nxori jashtë?

Unë kam qenë pjesë e debateve, sidomos me ata që më hahej muhabeti, ndërsa me të tjerët ishte diçka që ata nuk afroheshin. Por nuk mendoj se kam bërë ndonjë mëkat, që të jetë bërë shkak për daljen nga shtëpia, thjesht më pëlqente grupi me të cilët rrija.

Mos ndoshta pozicionimi yt në një klan tjetër ka qenë shkaku?

Kjo është e gjitha një lojë dhe normalisht grupet apo klanet në Big Brother janë më se normale. Kushdo që të hyjë brenda do të ketë një grup me të cilin afrohet më shumë. Nuk më pëlqen të isha asnjanëse.

Ju keni qenë një personazh tejet karizmatik, keni bërë që njerëzit të debatojnë në shtëpi dhe jashtë saj, cila është natyra e Oltës?

Karakteri im është ashtu si dhe e kam thënë brenda në shtëpi, jam një femër me karakter të fortë. Për mua është e rëndësishme që në çdo që kam bërë brenda shtëpisë, kam qenë e pastër dhe e hapur me të gjithë.

Jeni takuar me Bertinën pas daljes?

Jo nuk jam takuar. Marrëdhëniet kanë qenë ashtu siç ishin edhe brenda. Nuk kam takuar asnjë banor tjetër, pasi kam qenë shumë e zënë, jam marrë me shkollën dhe nuk jam takuar me askënd.

Mendon se mund të bëni paqe kur të mbarojë Big Brother?

Nuk mund të bëj paqe me një njeri që me akuzon drejtpërdrejtë, pa asnjë fakt dhe provë. Të gjithë e kanë parë sjelljen e saj edhe natën e daljes time. Mund të bëj paqe për një person me të cilin mund të jem grindur për lojë, por nuk bëhet fjalë të bëj paqe me Bertinën, e cila pasi doli nga Big Brother flet për mua dhe më akuzon pa të drejtë. Më akuzon për një puthje që nuk ishte asgjë, veçse shoqërore.

Pjesa e puthjes duket sikur ishte momenti që ngjalli më shumë debate, si është e vërteta?

Ishte e gjitha një puthje miqësore dhe asgjë më shumë, por Bertina ka menduar tjetër gjë ngaqë është xheloze. Kur ne ishim te pishina, unë e puth Erionin, siç mund të puthësh një shok. I kisha lyer buzët me të kuq të ndezur dhe Erioni u ngrit që ta fshinte, Bertina e inatosur, duke e ditur shumë mirë se kush e kishte puthur në faqe po i kërkonte atij llogari. Erioni ia ka thënë në sy, më ka puthur në faqe si shok dhe unë mund të puth në faqe këdo që e konsideroj shok dhe askush nuk mund të më ndalojë.

Sa e vërtetë është që do të bëni një padi ndaj Bertinës dhe pse?

Padija është bëra, pasi më ka akuzuar para 4 milionë shqiptarëve për gjëra të paqenë dhe të gjitha këto vijnë nga që është xheloze e sëmurë. Bertina ka probleme me veten, kur të sqarohet me veten, mund të sqarohet më të tjerët.

A vazhdoni ende të jeni e bindur se lidhja mes Erionit dhe Bertinës ishte një lojë?

Absolutisht e bindur që nuk ka qenë dashuri, por ka qenë qëllimi për të arritur në finale. Të gjithë ata që kanë pasur një lidhje kanë arritur të shkojnë në finale, kështu që lidhja mes Bertinës dhe Erionit sesa e vërtetë ishte, tregoi krejt të kundërtën. Ngelet që ta shohim gjithçka kur të dalë Erioni jashtë! Unë nuk jam futur në mes të Erionit dhe Bertinës për ti ndarë, por e kam thënë, e kam bërë për të vërtetuar dashurinë reale. Për mua mes tyre nuk ka dashuri, madje mes tyre nuk ekziston as fjala dashuri.

Kush mendon se po bënte më shumë lojë Erioni apo Bertina?

Jam e bindur se Erioni, ai e ka shfrytëzuar Bertinën për lojë.

Mendon që e gjithë kjo ka qenë një strategji?

Nuk mendoj se ka qenë strategji e Erionit apo e dikujt tjetër, thjesht Erioni ka shfrytëzuar momentin. Kjo është shumë e vërtetë, pasi vetë ai ka pohuar se nuk ka pasur në mend të krijonte lidhje në Big Brother, por javën e parë që ishte në nominim e krijoi atë. Pse pikërisht kur je në nominim mund të krijosh diçka të tillë, thjesht për të shpëtuar asaj jave dhe kjo nuk më pëlqeu. Erionit i është mbushur mendja nga Jetmiri, kur ishin të penalizuar dhe më pas ndodhi puthja.

Ju jeni e bindur se kjo dashuri nuk do të vazhdojë?

Jam shumë e sigurt që nuk do të vazhdojë jashtë shtëpisë.

Në disa momente kur ishit në shtëpi ju keni qëndruar shumë afër Erionit, pas daljes së Bertinës dhe kjo u kuptua si një tentativë për tu afruar, si është e vërteta?

Bertina ka menduar të kundërtën, sikur ne donim të krijonim një lidhje, sepse kështu i intereson. Por, Erioni e ka kuptuar se kjo ishte vetëm shoqëri. Sigurisht, nëse Erioni ka kuptuar diçka tjetër, ky është faji i tij.

A ke tentuar hapur, për të provokuar Bertinën, duke i qëndruar afër Erionit?

Vetëm atëherë kur e kisha kuptuar që mes tyre nuk ka pasur dashuri të pastër, unë doja të tregoja se cila ishte e vërteta. Kjo ka qenë edhe arsyeja e provokimeve, pasi nuk më dukeshin aq të dashuruar sa bënin brenda në shtëpi. Nuk kam pasur aspak qëllim të prish lidhjen e tyre (nëse do të ishte e vërtetë), por të tregoja se cila ishte e vërteta dhe që ata ta pranonin. Me pak fjalë doja të vërtetoja atë që unë dyshoja për historinë e tyre.

Sa e vërtetë është që ju keni ditur një sekret të Erionit, mbi një lidhje dashurore me një shoqen tuaj?

Realisht unë këtë gjë e mësova kur isha brenda. Erioni njihte babin tim. E gjitha ndodhi nga një fotografi që ne pamë kur ishim brenda dhe aty më tha që kishte pasur një lidhje me vajzën e shokut të babit tim. Kjo është ajo që mësova brenda për lidhjen e Erionit.

TIRANE- “Që prej 45 ditësh, unë, familjarët e mi dhe njerëzit e mi më të afërm, po përballemi me një realitet tepër të vështirë. Familjarët e mi sot po vuajnë për bukën e gojës. Të drejtat e tyre po shkelen ditë pas dite nga fryma e urrejtjes dhe diskriminimit, për shkak të orientimit tim seksual” kështu i drejtohet Klodian Cela kreut të qeverisë Sali Berisha dhe kryetarit të opozitës Edi Rama përmes një letre të hapur.

Një ditë pas mesazhit mbështetës të Sekretares Amerikane të Shtetit, Klodian Cela i cili deklaroi publikisht orjentimin e tij seksual gjatë një spektakli të ndjekur televiziv, i bën me dije politikës shqiptare vështirësitë me të cilat përballet ai dhe njerëzit me orientim seksual të ndryshëm nga të tjerët në Shqipëri.

“Nuk e doja veten ditën kur pashë Policinë e Durrësit të ushtronin dhunë psikologjike ndaj nënës sime duke i kërkuar me prepotencën që ta jep uniforma të largonte një tezgë të vogël shitjeje me të cilën siguron bukën e gojës. Unë nuk kërkoj të shkelet ligji, por dua që njerëzit të kuptojnë se ajo tezgë është e vetmja mënyrë të ardhurash për familjen time që punon për të mbijetuar, jo për të jetuar, e që tashmë nuk guxon as të ketë një jetë sociale nga frika se njerëzit do t’i tregojnë me gisht. Që ditën e parë kur unë dola nga Big Brother nisa të kërkoj një vend pune, por ajo që po gjej, në vend të punës, është vetëm urrejtje, homofobi dhe bezdisje e pakuptimtë” shkruan Klodi, ndërsa nuk nguron të thotë se në vitin 2010 ndihet i internuar në vendin e tij.

“Unë pres që politikanë si ju të tregojnë publikisht se mirëqënia sociale, fizike, e shpirtërore e të gjithë anëtarëve të shoqërisë, pa dallim, është realisht e mundshme.Tani është koha për fjalën tuaj dhe më shumë se kaq për veprimin tuaj” mbyllet letra e Klodit.
(e.n/BalkanWeb)

Për Erionin dhe Bertinën, vazhdimi i lidhjes pas shumë konflikteve dhe keqkuptimeve brenda shtëpisë së”Big Brother 3″ ishte si një diell pas shiut. Por tashmë duket se kjo lidhje nuk po thellohet ashtu siç fansat e tyre do të kishin dëshirë. Edhe pse kalojnë shumë kohë bashkë, shfaqet si një lidhje thjesht për argëtim. Miq të përbashkët të ish-banorëve të BB3 kanë treguar se është Erioni ai që nuk dëshiron ta bëjë gjithçka serioze në lidhjen e tyre, duke e shijuar deri tani pa ndonjë kokëçarje dhe preokupim të veçantë. Ndërsa nga ana e saj, Bertina thuhet se ka bërë të pamundurën për të qenë sa më afër Erionit si një partnere e vërtetë. Ajo jo pa qëllim ka marrë disa javë më parë një apartament me qira në rrugën e Elbasanit në Tiranë, duke u ndarë nga jeta me shoqet që bënte para se të hynte në këtë “reality show”. Por kryesorja ka qenë një apartament për t’i krijuar mundësinë Erionit të kalojnë kohë të gjatë bashkë. Por edhe pse ajo tashmë jeton vetëm, Erioni nuk ka vendosur ende të marrë rrobat dhe të nisë një bashkëjetesë me Bertinën, si një çift që mund të planifikojnë më mirë jetën e tyre të përditshme. Këtij fakti i shtohet edhe e vërteta që Erioni nuk ua ka prezantuar të dashurën prindërve të tij, apo të prezantohet vetë me mamanë e Bertinës, e cila jeton në Delvinë. Në fakt udhëtimi i tyre i parë si çift jashtë Tiranës ndodhi javën e kaluar, kur ata u nisën të dy drejt Vlorës pas ftesës që u bëri Jetmiri, për të festuar fitoren e tij. Bashkë me ta ka qenë edhe Rezarta, të cilën Jetmiri e ka marrë me vete në qytetin ku jeton, dhe ua ka prezantuar prindërve si të dashurën e tij. Jetmiri nuk e ka lënë me kaq këtë thellim të lidhjes së tij me vajzën kosovare, pasi këtë javë kanë udhëtuar bashkë me të drejt Kosovës, për t’u takuar me familjen e Rezartës. Kështu, ndryshe nga lidhja e Erionit dhe Bertinës, lidhja e Jetmirit me Rezartën pavarësisht komenteve që pati duke u cilësuar si “sipërfaqësore dhe banale” po merr nota serioziteti. Po çfarë do të ndodhë me Erionin dhe Bertinën?! Deri tani duket se kjo lidhje ka thjesht “fytyrë mediatike”, pasi ata kanë qenë çifti më i fotografuar në aktivitetet e ndryshme ku janë të ftuar, apo në argëtimet e tyre në jetën e natës. Dëshirës së Bertinës për ta bërë këtë lidhje sa më të vërtetë dhe konkrete, duket se Erioni nuk po i përgjigjet sa duhet. Planeve për t’u argëtuar gjatë verës së bashku, si dhe një udhëtim në Kosovë, nuk dihet nëse do t’u shtohen të tjera plane më të rëndësishme. Aktualisht Bertina ka filluar punë si specialiste marketingu në një kompani sigurimesh, ndërsa Erioni i cili ka një eksperiencë dy vjeçare si gazetar dhe spiker lajmesh, është në pritje të ofertave të reja në televizion. Ofertat krijojnë dhe konkurrencë mes ish-banorëve pas mbylljes së aventurës së tyre në “Big Brother”. Në këtë garë të BB3 u krijuan shumë armiqësi dhe urrejtje të ish-banorëve mes tyre. Siç e pamë dhe në programin “Post Big Brother”, ish-banorët nuk u kursyen me fjalë fyese drejtuar njëri-tjetrit. E vetmja aleancë e shpallur mes banorëve ishte kjo mes dy çifteve Erion-Bertina dhe Jetmir-Rezi, miqësi që ata kanë menduar ta thellojnë jashtë shtëpisë. Ata vetë e kanë trajtuar këtë katërshe si një sfidë të fituesve ndaj humbësve. Ndërsa për atë çfarë pritet në lidhjet e tyre varet nga ata. Për Erionin dhe Bertinën edhe pse u lidhën pas shumë keqkuptimeve nuk shihet ende ndonjë gjë e sigurt, nëse ata do të jenë çifti që s’mund t’i ndajë asgjë, apo ndjenja do të shuhet shpejt. Ndërsa përsa i përket Jetmirit dhe Rezit, edhe pse lidhja pati komente nga më të çuditshmet, të paktën deri tani, duket se po ecën ashtu siç nuk parashikohej. Nuk dihet nëse largësia mes Kosovës dhe Shqipërisë do të ndikojë për keq në këtë lidhje, gjithsesi gjithçka mbetet për t’u parë.

Ata që provojnë një eksperiencë si “Big Brother” pohojnë se mbasi dalin nga ajo shtëpi ku jeta është e monitoruar, mbasi bëhen personazhë televizivë dhe të dashur nga publiku, jeta e tyre nuk është më e njëjta. Kjo të paktën është ndjesia sapo ky program ul siparin dhe teksa kalon në rrugë, të gjithë të flasin dhe të kërkojnë autografe. Por nëse ka një personazh të këtij edicioni, i cili mund ta thotë me zë të lartë këtë fakt, që me të vërtetë një program si ky i solli ndryshim, madje revolucion në jetën e tij, ai është Klodian Çela. Teksa kërkonim informacione për jetën e tij përtej detit, ditët e para që u fut në shtëpinë e vëzhguar, pyetja e parë që të vinte në mendje ishte: “Po ai pse duhej të futej në “Big Brother?”. Kishte krijuar një jetë për t’u pasur zili, një gjendje ekonomike shumë të mirë, dhe miq të shumtë që e donin dhe e mbështesnin. Por më pas kur ai vendosi të ndajë me të gjithë shqiptarët të fshehtën e jetës së tij, orientimin e tij seksual, kuptuam se Klodi me të vërtetë paska patur një arsye të fortë për ta bërë këtë. Rrëfimi i Klodit ishte një këmbanë alarmi sidomos për të gjithë ata që janë si ai, por që bëjnë një sforco të jashtëzakonshme për t’u tjetërsuar në sytë e opinionit. “Të jetosh në falsitet dhe t’iu tregosh njerëzve që ti je ai që ata duan, por që në fakt është ndryshe, më duket një shpenzim i kotë energjie”, na rrëfen Klodi. Por si është pritur djali 36-vjeçar nga Lezha pas daljes së tij nga “Big Brother”? “Kur dola pashë mamanë disi të trembur dhe më pas kur më treguan gjithçka kishte ndodhur, i dhashë të drejtë. Por unë ju them sinqerisht, kam kaluar ditë shumë të mira, më ndalojnë në rrugë nga të rriturit e deri tek fëmijët. Është një ndjesi shumë e veçantë”, na rrëfen ai. Ndërkohë për të ideja për t’u zbavitur dhe për ta shpenzuar kohën kot gjasme si një njeri publik, i duket shumë absurde. Asgjë nga këto nuk ka në kokë Klodi. I mësuar të punojë që kur ishte i mitur, madje të bëjë dhe shumë sakrifica, ai ka ndezur motorët për të realizuar gjithçka ka në mendje. Dhe mbi të gjitha ka vendosur diçka shumë të rëndësishme, dëshiron të ndërtojë një jetë të re, këtu në Shqipëri, në atdheun e tij dhe pranë nënës së tij, që e ka pikë të dobët.
Tani synon televizionin
Ka qenë gjithmonë një natyrë artistike. I ka pëlqyer të merret me gjëra të bukura, me ato ku fantazia çlirohet pa limit dhe ia ka dalë. Si drejtor artistik i njërës prej diskotekave më të famshme në Itali, Klodi ka mundur të tregojë anën e tij artistike, e cila është pëlqyer shumë. Tani kërkon që të njëjtën gjë ta bëjë në Shqipëri dhe synon për këtë, botën e televizionit. Janë disa projektet që ka në kokë e meqë akoma nuk ka të kristalizuar diçka, preferon të mos flasë konkretisht, por premton se shumë shpejt do të jetë pjesë e ekranit, duke realizuar kështu një nga dëshirat e tij të hershme.
Plani për një shoqatë
Ndërkohë dëshiron që rrëfimin i tij ku ai iu tregoi shqiptarëve se një individ homoseksual nuk është një ufo, por një njeri me të gjitha vlerat e tij, mos të mbetet në kuadrin e një show mediatik, pasi edhe qëllimi i tij nuk ishte aspak ky. Tani qa ka dalë nga “Big Brother” ka vendosur të bëjë më shumë. Fakti që është pranuar nga shoqëria dhe këtë e tregojnë sjelljet e njerëzve, ka qenë një fillim shumë i mirë. Por në fakt a janë me të vërtetë shqiptarët kaq dashamirës me këtë kategori njerëzish? Pak javë më parë në një nga televizionet italiane, bëhej një provë për të testuar shkallën e homofobisë, duke çuar çifte gejsh ose lesbikesh në mes të njerëzve, të cilët fillonin dhe putheshin aty. Nëse këta individë ishin të panjohur, shiheshin me një farë përçmimi, nëse ata ishin të njohur si psh. personazhet e programit “Grande Fratello”, jo vetëm që nuk shiheshin me përçmim, por komplimentoheshin dhe iu kërkoheshin autografe. Konkluzioni, kur je një person publik, edhe homoskesualiteti është më i pranueshëm dhe nuk krijon bezdi. Këtë fakt po e provon çdo ditë edhe Klodi, Por e gjitha kjo për atë nuk mjafton. Ai kërkon të bëjë më shumë, jo për vete, por për të gjithë ata që janë si ai dhe bëjnë një jetë të nëndheshme dhe plot sekrete. Këto ditë nuk i kanë munguar kontaktet me djem dhe vajza që janë si ai, ata i bëjnë komplimente për kurajën dhe i luten që të mos e ndalojë këtu këtë nismë. “Kam parë që shoqatat në mbrojtje të homoseksualëve nuk kanë bërë pothuajse asgjë për këtë kategori, për t’i mbrojtur ata dhe sinqerisht më vjen shumë keq”, tregon ai. Pikërisht për këtë arsye ai ka filluar të angazhohet me “Aleancën e geive dhe lesbikeve të Shqipërisë”, një organizatë që sipas Klodit është shumë serioze, dhe aktivitetin e së cilës Klodi e ndjek vazhdimisht. Madje Klodi na tregon se shumë shpejt do të emërohet aty edhe zëdhënës. Por nuk do të ndalet me kaq, ai kërkon një mbështetje serioze për të bërë një shoqatë kundër diskriminimit të homoseksualëve, në mënyrë që ata të kenë vendin e tyre në shoqërinë tonë. Deri tani duket se ideja është pritur mirë dhe mbështetja nuk i mungon. Këto ishin pra disa nga planet e afërta të Klodit, për të rifilluar një jetë në vendin e tij dhe për të bërë atë që gjithmonë ka ëndërruar.
Uidhers: Politika bën retorikë, heshti për rastin “Klodi”
Ambasadori amerikan në Tiranë, Xhon Uidhers, nuk i ka kursyer kritikat ndaj politikës shqiptare, duke e cilësuar atë si boshe. I ndodhur në një konferencë rajonale me titull “Për mbrojtjen nga diskriminimi”, ambasadori tha se politika heshti për rastin “Klodi”, konkurrentin e “Big Brother-it 3”. “Politika heshti për rastin ‘Klodi’. Qeveria dhe opozita dinë të bëjnë vetëm retorikë në rastet e homofobisë”, tha Uithers. Ky është reagimi i të disatës herë nga Ambasadori amerikan, referuar mbrojtjes së komunitetit gay në Shqipëri. Qëllimi i konferencës ishte zbatimi i legjislacionit për mbrojtjen nga diskriminimi.